Venres, 30 Xuño 2017 11:46

O maxistrado Julio César Picatoste considera "de extrema gravidade" a crecente burocratización da Administración xudicial

Escrito por DXustiza
Valora este artigo
(1 Voto)

O maxistrado da Sección Sexta da Audiencia Provincial de Pontevedra Julio César Picatoste Bobillo, considera de "extrema gravidade a crecente burocratización da Administración de Xustiza" e "a espesura documental" na tramitación dos asuntos.

Picatoste leu onte o seu discurso de ingreso como membro de número da Real Academia Galega de Xurisprudencia e Lexislación nunha sesión solemne celebrada na sede de Afundación en Vigo á que acudiu, entre outros, o presidente do Tribunal Superior de Xustiza, Miguel Ángel Cadenas.

Na súa disertación, titulada "Kafka e o Dereito", o maxistrado efectuou un repaso crítico sobre a situación da xustiza, guiado pola visión que Kafka vertía na súa obra sobre os efectos que o Dereito, o Poder, a Lei, a Autoridade e a Burocracia teñen sobre o ser humano.

Picatoste foi rotundo ao cualificar de "extrema gravidade a crecente burocratización da Administración de Xustiza, de cuxa denuncia se ocupa a máis recente doutrina procesalista". A "espesura documental da tramitación e o seu especial enmarañamiento" deben preocupar tamén ao que imparte xustiza, resaltou Picatoste, para quen o rumbo burocratizante do Consello Xeral do Poder Xudicial é igualmente indesexable.

Neste sentido, lembrou a opinión do administrativista Alejandro Neto que asegura que "o Consello é un maníaco obsesivo da burocratización dos xuíces, o polo oposto da independencia xudicial".

Julio César Picatoste Bobillo durante su discurso de ingreso na RAGJyL
Ingreso de Julio César Picatoste na Real Academia de Xurisprudencia - DX

Picatoste Bobillo lembrou que igual que na novela O proceso ou na parábola Ante a Lei, de Kafka, reflexiónase sobre a tese de que a lei é descoñecida para o cidadán, na sociedade actual os cidadáns afrontan unha crecente dificultade para o coñecemento das leis.

"A incontrolada metástase reguladora fai dalgunhas parcelas do ordenamento xurídico unha intransitable telaraña lexislativa; vivimos nun mundo de leis desbocadas; é a era da lexislación motorizada", engadiu, asegurando que a consecuencia final desa masificación normativa é a opacidade das leis.

Para o novo académico, "a lexislación é, hoxe en día, de produción e dimensións industriais e a acción do lexislador, axitada, con frecuencia interina, de revisión constante, de vida e voos curtos". Parece, concluíu, coma se a técnica lexislativa dos nosos días "quixese profundar nesa ferida do afastamento kafkiano entre cidadán e lei".

Picatoste Bobillo detívose tamén na pugna entre legalidade e xustiza e no papel dos xuíces na sociedade actual. Asegurou o relator que "actualmente contrapóñense dous modelos, o que corresponde ao positivismo que fai da lei eixo central da actividade xudicial, e o que se inclina pola figura do xuíz que debe orientarse pola senda dos principios que conforman o sistema constitucional, mediante un exercicio argumentativo baseado na ponderación dos principios e valores que a Constitución proclama".

A súa intervención foi contestada polo presidente da Audiencia Provincial de A Coruña, José Luis Seoane Spiegelberg, e actuaron como padriños os tamén académicos José Manuel Romay Beccaría e Francisco Manuel Ordóñez Armán.

Deixa un comentario

Asegúrese de introducir toda a información requirida, sinalada cun asterisco (*). Non se permite código HTML.

Top