Entre os pasados 1 de xaneiro e 31 de marzo, os órganos xudiciais da comunidade resolveron 86.809 asuntos, polo que quedaban pendentes de resolver ao final do trimestre 118.834 asuntos, un 7,2% menos ca na mesma data do ano anterior.
Paralelamente, o número de asuntos ingresados nos xulgados e tribunais galegos no primeiro trimestre do ano foi de 82.931, o que representa un descenso do 3,8% respecto ao mesmo período de 2016, segundo o informe sobre a situación dos órganos xudiciais publicado hoxe pola Sección de Estatística do Consello Xeral do Poder Xudicial.
A diminución na entrada de asuntos, que favorece á da taxa de pendencia, foi especialmente notable na xurisdición penal (un 10,8 % menos) e na contencioso-administrativa (un 14 % menos), pero aumentou na civil (4,5 %) e sobre todo na social (9,6 %).
Datos por xurisdicións
Na xurisdición civil, o número de asuntos ingresados en Galicia no primeiro trimestre do ano foi de 53.942. Nese tempo resolvéronse 31 474 asuntos, quedando en trámite ao final do período 53.186, un 2,9 % máis que en 2016.
Na xurisdición penal entraron neste primeiro trimestre 41.428 asuntos, 288 de media por órgano xudicial. O número de expedientes resoltos foi de 43.592 e os ficaron pendentes ao final do período foron 35.254, un 17% menos có ano pasado.
Na xurisdición contencioso-administrativa ingresáronse 2.194 asuntos entre os pasados 1 de xaneiro e 31 de marzo, resolvéronse 2.947 e quedaron en trámite 5.611, un 22,4% menos ca en 2016.
Por último, a xurisdición social experimentou un incremento na entrada de asuntos, xa que os 7.910 ingresados representan un 9,6 por cento máis que no primeiro trimestre de 2016. O número de asuntos resoltos nesta xurisdición foi de 8.796 e quedaron en trámite ao final do período 24.783, un 6,8% menos. É dicir, a pendencia diminúe en Galicia en todas as xurisdicións menos en civil.
Tasa de litixiosidade
A taxa de litixiosidade en Galicia (30,63) sitúase por baixo da media do conxunto do Estado no primeiro trimestre de 2017, que foi de 32,26 asuntos por cada mil habitantes. Mentres que en contencioso e penal a taxa da comunidade se sitúa por baixo da media, é máis alta en civil e en social.
