O Consello Xeral do Poder Xudicial (CXPX) e a Xunta de Galicia acordaron hoxe a convocatoria de 12 actividades de formación continua para xuíces e maxistrados en 2017, dos máis ca o ano pasado. O orzamento máximo para o desenvolvemento do plan é de 49.000 euros.
Así se deu a coñecer hoxe na Coruña tras unha reunión na sede do Tribunal Superior de Xustiza de Galicia (TSXG), na que se renovou o convenio de colaboración que cada ano subscriben ambas as institucións.
A Xunta e o CXPX colaboran no financiamento, organización e xestión dos programas de formación e perfeccionamento dirixidos ao conxunto dos xuíces e maxistrados que prestan os seus servizos na comunidade autónoma galega. Á reunión asistiron o presidente do TSXG, Miguel Ángel Cadenas; letrados do Consello; e o director xeral de Xustiza, Juan José Martín, ademais de representantes das catro asociacións xudiciais.
Está prevista a celebración das seguintes actividades formativas para 2017:
- Concurso de persoas físicas.
- Novos instrumentos de cooperación civil na UE.
- Resposta penal fronte ao acoso.
- Seguridade viaria.
- Aspectos prácticos da execución penal.
- Encontro Orde Xurisdicional Contenciosa-Administrativo.
- Información médica nos procedementos de incapacidade permanente.
- Influencias da doutrina da Unión Europea na relación laboral e funcionarial.
- Medios de comunicación e linguaxe xurídico.
- Encontro galaico-portugués.
- Conceptos de contabilidade.
- Encontro de xuíces de paz das provincias da Coruña e Lugo.